Iragan larunbatean, 11/02, lehiatu zen Palako Kutxabank Ligaren 2. jardunaldia. Hartan, Gaubekak eta Garatek lehenengo aldiz lortu dute garaipena txapelketa honetan Landeta eta Ibai langileen aurka. Pixkanaka, gorridunak egokitzen doaz eta, jardunaldiek aurrera egin ahala, gero eta garaipen gehiago lortzen doaz bikote gisa.
Garate hobetzen doa pixkanaka, eta dagoeneko ezagutzen dugu Armintzako oilarrak egin dezakeena. Urdinetan, Ibai bikain ari da, eta Landeta maila onera iristeko gai bada, bikote arriskutsua eratuko dute. Ibargurenen debut ofizialean, lazkaotar gazteak saio ona eskaini du, naiz eta bikote sendo baten aurka galdu. Beñatek denetarik izan du ikuslearentzat partida berdindu eta ederra izan den horretan.